### கந்தபுராணம் ## பகுதி 6 ல் 2 ## சூரனின் திக்விஜயம்#
##pl check with writer any of your queries RAVIKUMAR P. 7904313077, ravikumar.writerpoet@gmail.com ###
நான்கு முன்துறைகளும் நிரம்பி வழிந்துகொண்டிருந்தன. சிறிது நேரம்கூட இடைவெளி இல்லாமல் மரக்கலங்களும் நாவாய்களும் வருவதுவும் செல்வதுமாகச் சூழ்நிலை மேலும் பரபரப்பாகிக் கொண்டிருந்தது.
அஸ்திராலயாவிலிருந்து வந்திருந்த நிகும்பதேசத்து அரசன் தன்னுடன் ஆயிரம் குதிரைகளைக் கொண்டுவந்திருந்தான். அவன் கொண்டுவந்த நன்குக் கப்பல்களுக்குமட்டும் தனியாக ஒரு முன்துறை ஒதுக்கப்பட்டு சூரனின் பிரதானத்தளபதி மற்றும் அவனது மெய்க்காப்பாளர் சுரேனர் தனதுக் கட்டுப்பாட்டில் வைத்துக் கொண்டு குதிரைகளை சரிபார்த்து இறக்கிக்கொண்டிருந்தார். நிகும்பன் குதிரைகளுடன் ஒருநாவாயில் ஐம்பது பெண்களையும் சூரனுக்கு அன்பளிப்பாகக் கொண்டுவந்திருந்தான். இதுசுரேனனுக்கு பழகிவிட்ட ஒன்றுதான் அவர்களை அரசனின் முன்கொண்டு நிறுத்தி அவன் தேர்வு செய்ததுபோக மீதம் உள்ளவற்றை மந்திரிகளும் தளபதிகளும் பங்கிட்டுக் கொள்வார்கள்.
சுரேனனுக்கு அரசனிடம் நெருக்கம் அதிகம். உளவுப்படைத் தலைமையும் அவன் வசமிருந்ததால் அவனது சொல்லுக்கு பெரியமதிப்பு அமைச்சர்கள் மத்தியிலும்கூட இருந்துவந்தது. அதனால் அரசனுக்குப் பிறகு தனக்கு வேண்டியப் பெண்களைச் சுரேனன் தேர்வு செய்துகொள்ளும் உரிமையை அரசன் அவனுக்குக் கொடுத்திருந்தார். ஆனாலும் சுரேனன் அதை ஒரு உரிமையாக இதுவரைப் பயன்படுத்தியது இல்லை மற்றவர்களுக்கே விட்டுக்கொடுத்துவிடுவான்.
குதிரைகள் இறங்கிக் கொண்டிருப்பதை நிறுத்திவிட்டு கைகளை உயர்த்தி சமிஞ்சை செய்தான். தூரத்தில் அவனது கையசைவைக் கண்டுகொண்ட வீரர்கள் விருந்தினர் வண்டிகளில் சிலவற்றை சுரேனன் நிற்கும் முன்துறைக்கு அருகில் அழைத்துவந்தனர்.
எளிதில் எட்டுமுதல் பத்துபேர் வரை அமர்வதற்கு வசதியாகவும் நான்குபக்கமும் அலங்காரப் பலகைகளைக் கொண்டு மூடி சிறிய சன்னல் வடிவத் துளைகளை கொண்டும் அந்த சாரட்டுகள் வந்து நின்றன. இரவில் பணிப்பதற்கு ஏற்ப இரண்டுபக்கங்களைளும் இரண்டு லாந்தர் விளக்குகளும் அமைக்கப் பட்டிருந்தன.
இந்த முன்துறைக்கு மட்டும் கடற்கரைச் சாலையிலிருந்து இணைப்புச்சாலை ஒன்று, இதுபோல பெண்கள் வரும் சமயமும் மன்னர்கள் பயணத்தின் போதும் நேரடியாக சாரட்டுகள் முன்துறையையின் பாலத்தைத் வந்துத்தொட்டுக்கொண்டு நிற்கும்படி கற்கள் கொண்டு மணலில் புதைத்துச் சாலை அமைக்கப்பட்டிருந்தது.
சுரேனன் அடிமைப் பெண்களைப் பாதுகாப்பாக இறக்கி அழைத்துக் கொண்டு செல்லக் காத்திருந்த சாரட் வண்டிகளில் அவர்களை ஒவ்வொருவராக உள்ளே பொதிக்க ஆரம்பித்தான். அரசனுக்குச் சேரவேண்டிய பரிசானதால் மற்ற வீரர்களோ காவலர்களோ அவர்களை நெருங்க அனுமதியில்லை. சுரேனனே நேரடியாக இந்தப் பணியைச் செய்வது வழக்கம்.
அவனது முதுகை எதோ கூர்மையான ஒரு அம்பு குறுகுறுவென்று துளைத்துக் கொண்டிருப்பதைப் போன்ற உணர்வுடன் திரும்பியவனை எதிர்கொண்டுச் சாய்த்தது இருவிழியம்புகள். சிறிது நிலைகுலைந்து போனவன் சமாளித்துக் கொண்டு அவளைக் கைதாங்கலாய் வண்டியில் ஏற்றிவிட்டுவிட்டுத் தான் குதிரையை நிறுத்திவைத்திருந்த இடத்திற்கு விரைந்தான். புரவி கட்டியிருக்கும் இடத்திற்கு வழக்கமாக உணவு உண்பதற்காக சூர்யோதயத்திற்கு பின்னர் ஒருநாளிகை கடந்தே வருபவன் ஏன் அங்கு வந்தான் என்று அவனுக்கே புரியாமல் புரவியில் ஏறிக் கடிவாளத்தை சொடுக்கினான். அவளது கையின் மனம் அவனை விட்டு நீங்காமல் அவன் பிடித்திருந்த கடிவாளத்திலும் தொற்றி வீசிக் கொண்டிருந்தது.
வழக்கமாக இப்படிவரும் பரிசுப்பெண்களை அனுப்பிவிட்டுவிட்டுத் துறைமுகத்தில் உள்ள பணிகளில் மூழ்கிவிடும் அவனுக்கு மனம் பின்னோக்கி பயணித்துக் கொண்டிருந்தது. கடற்கரையை நோக்கிச் சில அடிகள் எடுத்துவைத்த அவனது புரவி அவனையறியாமல் பாதையிலிருந்துத் திரும்பி அந்த சாரட்வண்டிகளின் பின்னல் சென்றுகொண்டிருந்த பாதுகாவலர்களுடன் சேர்ந்துகொண்டது. காவலர்கள் முகத்தில் பெரிய ஆச்சரியம் பொங்கியது. தலைவர் இன்று ஏன் நம்முடன் வருகின்றார் என்று அவர்களுக்குப் புரியாது ஒருவருக்கொருவர் பார்த்துக் கொண்டு புருவத்தைத் தூக்கி உதட்டைப் பிதுக்கிக்கொண்டனர்.
அரசவைக் கூடி முடிந்தவுடன் அரசர் இந்த அன்பளிப்புகளை மாலையில் தனிமையில் பார்வையிடுவார். இந்த ரகசியப்பரிசுகள் பலரும் அறிய அவையில் அறிவிக்கப்படாது. அரசனின் தனிப்பட்ட கணக்கேட்டில் வரவு வைக்கப்பட்டுவிடும். அதுவும் பரிசாகவந்தப்பெண்களின் சேவை மன்னனுக்குப் பிடித்துப்போய்விட்டால் அந்த தேசத்து அரசனுக்குச் சலுகைகள் வாரிவழங்கப்படும். மறுமுறை அந்த அரசன் மகேந்திரபுரி வரும் சமயம் அவனுக்குத் தனி வரவேற்பு இருக்கும். இன்று நிகும்பதேசத்து அரசன் அதை அனுபவித்துக் கொண்டிருக்கின்றான்.
உரோமானிய தேசத்திலிருந்தும் அமெரீசியாவிலிருந்தும் சிலகப்பல்கள் வந்திருந்தன. பெரும்பாலும் வியாபாரத்திற்காக மட்டுமே வருகின்ற அந்தக் கப்பல்களுக்கு இன்று முக்கியத்துவம் குறைவுதான். அமெரீசியாவிலிருந்து வரும் நாவாய்கள் கறுப்பர்கள் நாட்டினைக் கடந்து மட்டத்தீவில் சில நாட்கள் தங்கி வியாபாரம் செய்துவிட்டே இங்கு வரும். அதனால் இதில் மட்டத் தீவில் நெய்யப்படும் ஆடைகளும் அணிகலன்களும் உடன் நிறைந்திருக்கும்.
இன்றைய முக்கியத்துவம் வேறு. அரசனைப் பார்க்கக் கப்பம் கொண்டுவந்த நாவாய்கள் முதல் வரிசையில் கொண்டுவரப்படும். காததூரத்தில் நங்குரம் இட்டுக் காத்திருக்கும் நாவாய்களுக்கு அறிவிப்பு செய்து உடன் அழைத்து வந்து முன்துறையில் சேர்ப்பதற்கென்றே நான்கைந்து ரோந்துக்கலங்கள் சுற்றிக் கொண்டே இருக்கும். இடம் காலியான சமிக்ஞை கிடைத்தவுடன் அவைகள் புறப்பட்டுத் தூரத்தில் நங்குரம் இட்டுக் காத்துக்கொண்டிருக்கும் நாவாய்களை அணுகிக் கூப்பிடும் தூரத்திற்கு அருகில் சென்று அவைகளில் பறந்துகொண்டிருக்கும் கொடிகளை அடையாளம் கண்டுகொண்டு வழிகாட்டி அழைத்துக்கொண்டுவந்து முன்துறையில் சேர்க்கும்.
இன்று கப்பல்களின் எண்ணிக்கை வழக்கத்தைவிடப் பத்துமடங்கு அதிகம். காரணம் சூரன் அழைப்பை ஏற்று நட்பு அரசர்கள் பலர் அவனைச் சந்திக்க வந்திருக்கின்றனர். நான்கு முன்துறைகளிலும் எந்த அரசர் எங்கு வருகின்றார் என்று தெரியாமல் அழைத்துச் செல்ல வந்தவர்கள் இங்குமங்கும் ஓடிக் கொண்டிருந்தனர். அதனால் கரையெங்கும் ஒரே ஆரவாரமாக இருந்தது.
முன்துறையின் பாலத்தின் வழியாக இறங்குபவர்களை அடையாளம் காண்பதற்காகப் பணியாளர்கள் பலர் அவரது பெயரைச் சொல்லி உரக்க கூவிக்கொண்டிருந்தனர். விருந்தினர் மாளிகைக்கு அரசர்களை அழைத்துச் செல்ல குதிரைகள் பூட்டப்பட்ட சாரட்வண்டிகள் நூற்றுக்கணக்கில் கடற்கரையையொட்டிய சாலையில் தயாராக நின்றுகொண்டிருந்தன. அதனருகே அங்கங்கே வைகறை அங்காடிகள் பல முளைத்திருந்தன. சூர்யோதயத்திற்கு பின்னர் இவற்றில் பெரும்பாலவைகள் இருந்த இடம் தெரியாமல் மறைந்துவிடும். ஒருசில உணவும் பானங்களும் விற்கும் அங்காடிகள் மட்டுமே பகல் முழுவதுவும் தம்பணியைத் தொடரும். மீண்டும் மாலையில் இவற்றின் சேவைகள் துவங்கி உற்சாக பானங்கள் பரிமாற்றம் முன்னிரவுவரை நீடிக்கும்.
இப்பொழுதுக் காலைக் குளிரைப்போக்கி இதமாக்கசிலஅங்காடிகள்சூடான மூலிகை பானங்களை தயாரித்துக் கொடுத்து வெள்ளிக் காசுகளை அள்ளிக் கொண்டிருந்தனர். புட்டுகளும் அப்பமும் விற்கும் அங்காடிகள் பஞ்சமில்லாமல் எங்கும் நிறைந்திருந்தன.
இன்று இரவுக் கேளிக்கை விடுதிகள் நிரம்பி வழியும். வந்திருக்கும் அரசர்கள் அனைவரும் பொற்காசுகளைக் கொண்டு விலைமகளிர்களை அர்ச்சனை செய்யப்போகின்றார்கள். விலைமகளிர் ஒருவருடத்திற்குத் தேவையான பொருட்களை இன்னும் சிலநாட்களில் சம்பாதித்துவிடுவார்கள். சாதாரண நாட்களில் யாரும் திரும்பிக்கூடப் பார்க்காத விலைமகளுக்கும் இன்றுப் பெரிய வரவேற்பு இருக்கும். ஆட்டமும் பாட்டமும் மகேந்திரபுரியையே நிறைத்திருக்கும்.
தரைவழியாக வந்த அரசர்கள் மகேந்திரபுரியின் மற்ற மூன்று பக்கங்களிலும் நகரத்திற்கு வெளியே கூடாரம் அமைத்துக் கொடுக்கப்பட்ட இடத்தில் தமது சாகைகளை அமைத்துக் கொண்டுத் தங்கியிருந்தனர்.
முன்னிரவின் கடைசிஜாமம் முடிவுக்கு வந்திருந்தது. விடிந்ததற்கான அறிகுறியாகக் கோட்டை வாசலிலிருந்து கொம்புநாதம் மூன்றுமுறை உரக்க ஒலித்துவிட்டுப் பின்அடங்கிக் கொண்டது. இரவு முடிந்து புதுநாள் துவங்கவிருப்பதின் அடையாளமே இந்தக் கொம்புநாதம். சூரியன் உச்சிக்கு வந்தவுடனும் மேற்கில் மறையும்போதும் இந்த சப்தம் மீண்டும் ஒலிக்கும்.
கோட்டை மேற்தளத்தில் கொத்தளத்தில் எந்த நிழலும் படாத இடத்தில் அமைக்கப்பட்டிருந்த சூரிய கடிகாரத்தின் காவலாள் தினமும் செய்யவேண்டியப்பணியிது.
### கந்தபுராணம் ## பகுதி 6 ல் 2 ## தொடரும்.....
